Koktebel Jazz Party фестивали Къырымда вакъиа туризмини инкишаф этмеге ярдым эте, деди журналистлерге Къырымдан Русие Федерациясынынъ Девлет Дума мебусы Светлана Савченко.
"Мында вакъиа, медений туризмни инкишаф эттирмек керек. Koktebel Jazz Party — шаркъий Къырымгъа илерилемеге ярдым эткен тедбирдир… Эм де фестиваль Къырымнынъ тарихына дикъкъат джельп эте", — деп, бильдирди Савченко журналистлерге Коктебельде кечирильген матбуат-конференцияда.
Мебус фестивальде энди учь кере булунгъаны акъта айтты ве оны Къырымда кечирильген музыкаль вакъиалар арасында энъ корюмли деп, адлады. О, къайд этти ки, Къырымда фестиваллернинъ инкишафы инфраструктур лейхалар амельге кечирилюви себебинден мумкюн олды. Тамам бу лейхалар туристлер ичюн Къырымгъа ёл ачты.
Koktebel Jazz Party халкъара джаз фестивали Къырымда 17-нджи кере августнынъ 23-25 куньлери кечеджек. Биринджи куню, августнынъ 23-нде, эсас санада Dave Yarden Band (США), русиелилер Guru Groove Foundation ве Алексей Кузнецов, эм де американ боразанджы, «Грэмми» мукяфатынынъ алты дефа саиби Рэнди Брекер ве Сергей Головнянынъ биг-бэнди чыкъышта булунаджакълар. Джума эртеси куню, августнынъ 24-нде, Алманиядан Nils Wülker Band, Русиеден Billy's Band ве Юлия Чичерина, эм де АКъШ-дан джаз йырджы Шарон Кларк хедлайнерлер оладжакълар. Базар куню, августнынъ 25-нде, эсас санада пианоджы Даниил Крамер (Русие), франсыз Lamuzegeule, Яков Окуннинъ халкъара коллективи ве американ гитарджысы Селвин Бёрчвуднынъ блюз-бэнди чыкъышта булунаджакълар.